Nxënësit e klasave të nënta të shkollës fillore “Ismail Qemali” nga Prishtina kanë vizituar sot Kuvendin e Kosovës ku janë mirëpritur nga kryetari i PDK-së, Memli Krasniqi si dhe nga deputetet Shqipe Selimi dhe Albana Bytyqi.

Krasniqi në llogarinë e tij në Facebook, ka publikuar disa fotografi së bashku më nxënësit teksa ka shkruar se është emocionuese të shohësh gjeneratën e parë të lindur pas shpalljes së Pavarësisë, përcjell Arbresh.info.

“Në Kuvendin e Kosovës, bashkë me deputetet Shqipe Selimi dhe Albana Bytyqi, sot pritëm nxënësit e klasëve të nënta të shkollës fillore “Ismail Qemali” nga Prishtina – vajzën time Borën, me shoqet dhe shokët e saj. Është emocionuese të shohësh gjeneratën e parë të lindur pas shpalljes së Pavarësisë, duke u rritur në liri e përplot ëndrra për të ardhmen – në shtëpinë e tyre, në shtetin e tyre”, ka shkruar Krasniqi.

Krasniqi theksoi se nxënësve u ka rrëfyer për ditën historike të shpalljes së Pavarësisë së Kosovës.

“Nga vendi ku isha i ulur si deputet i Kuvendit më 17 shkurt 2008, në Ditën e Shpalljes së Pavarësisë, u rrëfeva për atë ditë historike për shtetin dhe popullin tonë. 16 vjet më pas, pozitën e ulëses e kam ndryshuar disa herë, por misioni për një Kosovë të zhvilluar, të denjë për sakrificat e brezave të kaluar dhe që mundëson realizimin e ëndrrave të fëmijëve tanë – vazhdon me përkushtim dhe dashuri edhe më të madhe. Sepse, për këta fëmijë dhe për këtë shtet, kontributi dhe angazhimi nuk duhet të ndalet asnjëherë”, ka shkruar mes tjerash Krasniqi./Arbresh.info